In ’n poging om opleiding in die pas met bedryfsbehoeftes te bring, stel die Vereniging van Eiendomseienaars van Suid-Afrika (Veesa) die einde van die maand drie nuwe eiendomskursusse bekend.
Die oogmerk van die Introduction to Commercial Property-program is om ’n algemene oorsig te bied van die kommersiële eiendomsmark vir nuwe toetreders tot die sektor.
Die driedaagse kursus sal ’n verskeidenheid eiendomsonderwerpe dek, van Suid-Afrikaanse eiendomsterme en stadsbeplanning tot eiendomsbemarking en die oordragproses.
Die bekendstellingskursus sal in Gauteng aangebied word in vennootskap met Wits, in KwaZulu-Natal in Mei ook in vennootskap met Wits en in Junie in die Wes-Kaap in vennootskap met die Universiteit van Kaapstad. Die Essential Commercial Property-program, ’n vierdaagse kursus, sal ’n meer gevorderde oorsig van die kommersiële-eiendomsbedryf bied, onder meer hervormingskwessies, finansieringsbesluite en genoteerde eiendom .
Dan is daar die nuwe Property Management-program wat oor agt maande sal strek en gemik is op eiendomsbestuurders. Dit sal modules insluit oor eiendomsreg, tegnologie en eiendomsbestuur.